Britaniyalı nazirdən Türkiyə etirafı: “Xəta etdik!”

           Britaniyalı nazirdən Türkiyə etirafı: "Xəta etdik!”

Musavat.com Türkiyənin "Hürriyet” qəzetinə istinadən xəbər verir ki, nazir Qouv Böyük Britaniyanın Avropa Birliyindən ayrılması ilə bağlı keçirilən referendumda Türkiyənin anti-təbliğat vasitəsi kimi istifadə olunmasını böyük xəta adlandırıb.

Maykl Qouvun fikrincə, Böyük Britaniya əhalisinin radikal sağ kəsimlərinin referendumda ayrılmaq üçün səs verməsindən ötrü onlar Türkyənin Avropa Birlyinə daxil olacağı perspektivini əsas göstəriblər

Bununla da Britaniya seçicilərini əbəs yerə qorxudublar.

"The Guardian”ın xəbərinə görə, "Breksit” referendumunda Böyük Britaniyanın Avropa Birliyindən ayrılmasının ən qızğın tərəfdarlarından biri sayılan Qouvun iki il sonra peşman olduğu gözə çarpır.

Qeyd olunur ki, "Breksit” məsələsinin üstündən 2 il keçməsinə rəğmən Böyük Britaniyada bununla bağlı mübahisələr hələ də səngiməyib.

"BBC türkce”nin məlumatına görə, indi bütün tənqidlər "Breksit”dən çıxış yolu tapa bilməyən baş nazir Tereza Meyə yönəlib.
Hətta baş nazirin mənsub olduğu Mühafizəkarlar partiyasının üzvü olan keçmiş təhsil naziri Castin Qrininq ikinci referendumun təyin olunması barədə çağırış edib.

"The Times” qəzetinə yazan Qrininq Tereza Meyin irəli sürdüyü "Breksit”lə bağlı saziş planının uydurma və bərbad olduğunu bildirib.

Qrininq "son qərarı işi dalana sürükləyən siyasətçilər deyil, xalq verməlidir” deyə yazıb.

Keçmiş nazirin yanvar ayında kabinetiçi mübahisələrdən sonra istefa verdiyi bilinir.