İtdən, təyyarədən, atdan qorxan dünya liderləri - Fobiya

         İtdən, təyyarədən, atdan qorxan dünya liderləri -Fobiya

Teleqraf.com bu dəfə dünyada tanınmış siyasi liderlərin hansı fobiyalara aludə olduğunu oxucularına təqdim edir:

Merkel

Almaniyanın hazırkı baş naziri Angela Merkel uşaqlıq dövründə köpəyin hücumuna məruz qalıb. Bu isə daim onun yaddaşına həkk olunub.

Merkel it görən kimi həyəcanlanır. Məhz bu səbəbdən də Rusiya lideri Putin Merkelin bu fobiyasından dəfələrlə yararlanıb. Merkelə it hədiyyə edən Putin Almaniya lideri ilə görüşlər zamanı Koni adlı itini də özü ilə götürməyi unutmur.

Buş

ABŞ-ın sabiq prezidenti Corc Buş at görəndə uşaqlıqda keçirdiyi psixoloji sarsıntını yenidən yaşamalı olur. Kovboyların məşhur Texas əyalətində yaşayan Buş sonralar Meksikanın lideri Viçento Foxsun at üzərində gəzmək təklifini düşünmədən rədd edib.

Qəddafi

Liviyanın öldürülən lideri Qəddafinin ən dəhşətli fobiyası bağlı məkanlarda gecələmək olub. Məhz bu səbəbdən də Qəddafi səfər etdiyi ölkələrə özü ilə yanaşı bədəvi çadırını da götürüb. Xarici ölkələrdə çadırını qurduran Qəddafi gecələr rahat yata bilirmiş.

Kim Yonq

Şimali Koreyanın sabiq lideri Kim Yonq-il 1976-cı ildə keçirdiyi helikopter qəzasından sonra təyyarədən istifadə etməyə qorxub. Bu səbəbdən də əksər səyahətini zirehli qatar vasitəsilə həyata keçirib.

General Than
Myanmanın sabiq diktatoru, general Than Shve adətən astroloji proqnozlar əsasında hərəkət edirmiş. Diktator astroloqların məsləhətindən sonra paytaxtı Yanqondan Naypidodu şəhərinə köçürüb.