Xətai rayonunda gecə ilə ağaclar kəsildi-FOTOLAR
Xətai rayonunda ağacların kütləvi kəsilməsi prosesi davam
edir. AFN xəbər verir ki, bu gecə də rayonda ağaclar kütləvi surətdə kəsilib.
Bu barədə isə feyzbuk istifadəçiləri məlumat veriblər.
Belə ki, Əhmədli yaşayış massivi, M.Hadi küçəsi 23/ 24 saylı bina ("Əhmədli”
metrostansiyasının çıxışında yerləşən Beynəlxalq Bankın ofisinin arxası)
yaşayan sakinlər adından Teymur Mahmudov məlumat və fotolar paylaşıb. Aydın
olur ki, qeyd edilən ünvanda keçmiş Xətai rayon Təhsil İdarəsinə gedən yolun üzərində
bu gecə genişmiqyaslı ağac soyqırımı həyata keçirilib: "Təxminən 50-dən artıq
iri gövdəli, çoxillik ağaclar məhv edilib. Bu ağaclar bizim həyətimizi və həyatımızı
bəzəyirdilər!
Deyilənə görə, məhv edilmiş ağacların yerində hündürmərtəbəli yaşayış binası
inşa edilməlidi. Əgər bu baş verərsə həmin ərazidə sosial fəlakətlərin baş verəcəyi
qaçılmazdır. Ərazidə avtomobillərin saxlanması və hərəkəti baxımından onsuz da
dəhşətli gərginlik hökm sürür. Üstəgəl, daha bir yaşıllıq zolağının sıradan
çıxması oksigen çatışmamazlığına yol açacaq. Ən əsası isə körpələrin, uşaqların
əylənməsi üçün heç bir ərazi qalmır”.
T.Mahmudov bildirib ki, ağac soyqırımı bu gecə saat 20:00-dan səhər saat
06:00-dək həyata keçirilib.
Qeyd edək ki, rayon icra hakimiyyətilə əlaqə saxlayıb məsələyə münasibət öyrənmək
cəhdlərimiz boşa çıxdı. Qarşı tərəfin mövqeyini verməyə hazırıq.
Hadisə yerindən çəkilən fotoları təqdim edirik: