Bakıda Borçalı turniri başa çatdı
Bakıda Borçalı kəndləri arasında futbol çempionatı keçirilib. Gürcüstanın azərbaycanlıların kompakt yaşadığı Borçalı bölgəsinin kəndlərinin yarışdığı turnirə ötən ilin dekabr ayında start verilib. 20 komandanın mükafatlar uğrunda mübarizə apardığı yarış 2 ay davam edib. Fevralın 18-də keçirilən iki oyunla mükafatçıların adlarına aydınlıq gəlib.
Çempion finalda "Kirov Yunayted"ə qalib gələn "Sarallar United" komandası olub. "Ormeşən FK" üzərində qələbə qazanan "Kəpənəkçi FK" isə turniri üçüncü pillədə başa vurub.
Mükafatçılara kubok, diplom və medallar, eyni zamanda yarışın sponsorlarının xüsusi hədiyyələri təqdim olunub.
Turnir boyunca fərqlənən oyunçulara da fərdi mükafatlar verilib. Yarışın bombardiri "Faxralı FK"-nın hücumçusu Məhəmmədəli Hüseynov, ən yaxşı oyunçusu isə çempion komandanın forvardı Nemət Ömərov olub.
Yarışın təşkilatçısı, Gürcüstan azərbaycanlılarının Facebookda ən aktiv olduqları "Gürcüstanlılar" səhifəsinin admini Zöhrab Məmmədov saytımıza verdiyi açıqlamada bildirib ki, yarışın təşkilində əsas məqsəd Borçalı gəncləri arasında dostluq, qardaşlıq və birlik duyğularının möhkəmləndirilməsidir: "Biz göstərmək istədik ki, bu gənclər hər zaman bir olmağı, birləşməyi və həmrəy olmağı bacarırlar. Yarışı ənənəvi formata keçirmək və növbəti yarışlarda daha çox iştirakçının cəlb olunmasına çalışacağıq. Turnirin təşkilində mənə kömək edən Təşkilat Komitəsinin digər üzvlərinə, bütün iştirakçılara təşəkkür edirəm".
