Yayılan yoluxucu xəstəliklərlə
bağlı valideynlərə müraciət edildi
Ukraynada, Rusiyanın bir neçə vilayətində, eləcə də İtaliya, Ruminiya da daxil olmaqla, Avropa ölkələrində qızılca epidemiyası yenidən alovlanıb. Xüsusilə, Ukraynada bu ilin əvvəlindən indiyədək 12 minə yaxın adam qızılcaya yoluxub və onların əksəriyyəti azyaşlıdır. Yoluxanlar arasında hərbiçilər, müəllimlər də var.
Artıq bir neçə ildir Azərbaycanda qızılca qeydə alınmır. Ukrayna və Rusiyada minlərlə azərbaycanlı yaşayır. Bəs miqrantlar vasitəsilə xəstəlik ölkəmizə keçə bilərmi?
Respublika Gigiyena və Epidemiologiya Mərkəzinin direktor müavini Afaq Əliyeva virtualaz.org-a deyib ki, xəstəliyin miqrantlar vasitəsilə Azərbaycana keçmə ehtimalı var.
"Ukraynada qızılca əleyhinə peyvəndlənmə 50 faizə yaxın olub. Məhz peyvənddən imtina edildiyi üçün ölkədə qızılca kütləvi yayılıb. Peyvənd olunmayan, immun sistemi zəif insanlar xəstəliyə tez yoluxurlar. Buna görə də, valideynlərə müraciət edirik, uşaqları yalnız peyvəndlə qorumaq mümkündür”, - Əliyeva qeyd edib.
Azərbaycanda qızılcaya qarşı peyvəndləmə 98 faiz yerinə yetirilib. Direktor müavini deyir ki, qızılca olduqca ağır xəstəlikdir, pnevmoniyaya və xəstənin ölümünə səbəb ola bilər: "Azərbaycanda 7-35 yaşlı vətəndaşlar arasında kütləvi peyvəndləmə aparıldı, bundan sonra məktəblilər və ana ola biləcək qadınlar peyvənd edildi. İndi hətta qızılcaya yoluxmada şübhəli bildiyimiz xəstələr də yoxdur”.
Afaq Əliyeva az da olsa peyvənddən imtina edən valideynlərin olduğunu söyləyib: "Peyvənd uşağın hüququdur, üstəlik qızılca əleyhinə peyvəndin fəsadları yoxdur. Sadəcə, valideynlər arasında maarifləndirməyə ehtiyac var”.
Qeyd edək ki, Ümumdünya Səhiyyə Təşkilatı (ÜST) qızılcadan ildə 150 min insanın öldüyünü bildirib. Ölənlərin əksəriyyəti peyvənd olunmayan azyaşlılardır. Qızılca çox zaman pnevmaniya və beyin iltihabı kimi ağrlaşmalara səbəb olur. Xəstəlik yaxın təmas və hava-damcı yolu ilə yoluxdurulur.
