28 May -iqtidarlı-müxalifətli hər kəsin bayramı
Yaxın üç gündə silsilə bayram tədbirləri keçiriləcək
Azərbaycan Xalq Cümhuriyyətinin 100 illik yubileyi ilə bağlı müxtəlif dövlət qurumlarında, təhsil müəssisələrində, ölkə xaricində tədbirlər keçirilir, bu şanlı tarixi hadisələrlə bağlı seminarlar təşkil olunur. Cümhuriyyət tədbirlərini həm dövlət qurumları, həm də müxtəlif siyasi, ictimai təşkilatlar təşkil edirlər.
Xatırladaq ki, ötən ilin may ayında prezident İlham Əliyev Azərbaycan Xalq Cümhuriyyətinin 100 illik yubileyi haqqında sərəncam imzalayıb. Həmin sərəncamda Xalq Cümhuriyyətinin milli dövlətçilik salnaməsini müstəsna dərəcədə zənginləşdirdiyi və Azərbaycan Xalq Cümhuriyyətinin 100 illik yubileyinin respublikada dövlət səviyyəsində geniş qeyd edilməsi əksini tapıb. Nazirlər Kabinetinə Azərbaycan Xalq Cümhuriyyətinin 100 illik yubileyinə həsr olunmuş tədbirlər planı hazırlamaq tapşırılırdı, Milli Məclisə Azərbaycan Xalq Cümhuriyyəti Parlamentinin yaranmasının 100 illik yubileyi münasibətilə xüsusi iclasın keçirilməsi tövsiyə edilirdi.
28 May Respublika Günü - Xalq Cümhuriyyətinin 100 illiyi münasibətilə Azərbaycan Respublikasının prezidentinin "İstiqlal” abidəsini ziyarət edəcəyi, ölkə prezidentinin adından rəsmi qəbul, təntənəli bayram mərasimi keçiriləcəyi bildirilir. Bakı Şəhər İcra Hakimiyyətindən verilən məlumatda isə deyilir ki, mayın 28-də böyük bayram konserti keçiriləcək.
Siyasi partiyalarda "Cümhuriyyət-100" tədbirləri keçirilir və mayın 28-də bayram tədbirləri daha geniş şəkildə keçiriləcək.
Hakim Yeni Azərbaycan Partiyasının rayon təşkilatlarında bayram tədbirləri keçirilir. Müxalifət partiyaları isə mayın 28-də bayram mərasimlərini Novxanıda Azərbaycan Xalq Cümhuriyyətinin banisi Məhəmməd Əmin Rəsulzadənin abidəsi önündə keçirməyi planlaşdırıblar.
Müsavat Partiyasından əldə etdiyimiz məlumata görə, mayın 28-də "İnşaatçılar” metrostansiyasının yaxınlığındakı "Məhsul” stadionunda bayram mitinqi keçirmək üçün Bakı Şəhər İcra Hakimiyyətinə rəsmi məktub göndərilib. Lakin BŞİH bayram mitinqinə razılıq verməyib. Ona görə Müsavat Partiyası mayın 28-də Azərbaycan Xalq Cümhuriyyətinin 100 illiyi ilə bağlı bayram tədbirini Novxanıda keçirəcək.
Əli Kərimlinin rəhbərlik etdiyi AXCP-nin daxil olduğu Milli Şuranın mayın 28-nə "Məhsul” stadionunda keçirmək istədiyi bayram mitinqinə də razılıq verilməyib. Milli Şuradan verilən məlumata görə, BŞİH bildirib ki, mitinqin mayın 26-da keçirilməsini məqsədəuyğun hesab edir. BŞİH-in cavabının Milli Şurada müzakirə edildiyi, mayın 26-da mitinq keçirmək qərarından imtina olunduğu bildirilir.
Qurum mayın 28-də Novxanıda Azərbaycan Xalq Cümhuriyyətinin 100 illiyi ilə bağlı bayram mitinqi keçirməyə qərar verib.
AĞ Partiyanın sədri Tural Abbaslı isə bildirdi ki, onlar AĞ partiya olaraq Cümhuriyyətin 100 illik yubileyinin ancaq bir ayda və ya bir gündə qeyd olunmasının tərəfdarı deyillər. Bu tədbirlər bütün il boyu keçirilməlidir:"Çünki bu hadisə bizim təsəvvür etdiyimizdən də böyük bir hadisədir. Odur ki, biz çalışacağıq il sonuna qədər bu mövzuda bir neçə tədbir keçirək. Konkret olaraq, 28 may günü isə AĞ partiyanın rəhbərliyi olaraq ya Məhəmməd Əmin Rəsulzadənin Novxanıdakı abidəsini, ya da şəhərin mərkəzindəki İstiqlal abidəsini ziyarət etməyi planlaşdırırıq. Təbii ki, digər partiya və təşkilatların dəvət etdikləri tədbirlərdə də iştirak edəcəyik”.
AMİP katibi Elşən Mustafayev isə bildirdi ki, AMİP Cümhuriyyətimizin 100 illiyi ilə bağlı tədbirlərə ilin əvvəllərindən başlayıb. Tədbirlər çərçivəsində indiyədək 2 dəyirmi masa təşkil olunub, xarici qonaqların iştirakı ilə Bakıda AMİP-in təşkil etdiyi beynəlxalq konfransın bir paneli 100 illiyə həsr olunub:"Eyni zamanda AMİP-in üzv olduğu Beynəlxalq Demokrat İttifaqına daxil olan dünyanın 100-ə yaxın partiyasına Cumhuriyyət tariximizlə bağlı məlumatlar, bilgilər göndərilib. 28 mayda da partiya üzvləri ilə birgə bayram tədbiri keçirəcəyik”.
KXCP İdarə Heyətinin üzvü Xəzər Teyyublu bildirdi ki, ənənəvi olaraq bayram tədbirləri keçiriləcək.
VİP, AXP, ADP və digər siyasi təşkilatlar da mayın 28-də bayram tədbirləri keçirəcəklər.
Etibar SEYİDAĞA, musavat.com
