Tramp və Putin niyə məhz Helsinkidə görüşməyə qərar verdilər?

Bundan öncə görüşün harada keçiriləcəyi mövzusu jurnalistlər üçün ayrıca maraq mövzusuna çevrilmişdi. Məlum olduğu kimi, Tramp öncə Vladimir Putini Vaşinqtona dəvət etmiş, onunla Ağ Evdə görüşmək istəmişdi. Rusiya tərəfinin bu təklifə soyuq yanaşması səbəbindən bu dəfə Vyana variantı ortaya çıxmışdı.

Nəhayət, prezident Donald Trampın milli təhlükəsizlik məsələləri üzrə müşaviri Con Boltonun Moskva səfərində hər iki tərəf görüş yerini dəqiqlədirə biliblər - Helsinki.

ABŞ-ın həftəlik "Time” jurnalının şərhçisi Billi Perriqo prezidentlərin məhz bu şəhərə üstünlük verməsini bir neçə səbəblə bağlayır.

1975-ci ildə ABŞ prezidenti Cerald Ford sovet lideri Leonid Brejnevlə məhz bu şəhərdə görüşüb. Həmin vaxt iki ölkə rəhbəri soyuq müharibənin ən qızğın çağında kommunist və kapitalist dövlətlər arasında münasibətlərin yaxşılaşdırılması yolunda birgə səylər haqqında bəyannamə imzalayıblar.

"Doğrudur, hazıkı məqamda ABŞ və Rusiya arasında münasibətlər o qədər də düşmənçilik xarakteri daşımır. Lakin hər halda Helsinkinin tarixi onları bu şəhəri seçməyə sövq edib”,- müəllif bildirir.

1990-cı ildə, Sovet İttifaqının dağılması ərəfəsində ABŞ prezidenti Corc Buş Mixail Qorbaçovla İran körfəzində yaranan böhranı müzakirə etmək üçün yenə də Helsinkidə bir araya gəlib.

Müəllifin fikrincə, Finlandiyanın NATO-ya daxil olmaması Trampa özünəməxsus simvolik jest etmək imkanı verib. Bu cür jestlərin beynəlxalq münasibətlərdə əhəmiyyəti olduqca böyükdür. Yəni ABŞ prezidenti Rusiya lideri ilə görüşmək üçün NATO ərazisini tərk etməyə belə hazır olduğunu ifadə edir.

Sammitə bir neçə gün qalmış Ağ Evin rəhbəri NATO zirvə toplantısında iştirak etmək üçün Brüsselə yola dşüəcək, oradan isə Böyük Britaniyaya keçəcək. Məntiqli olaraq bu Tramp və Putin arasındakı görüşü daha anlamlı hala gətirir.

Bundan başqa, Rusiyada keçrilən futbol üzrə dünya çempionatı da iyulun 15-də başa çatır. Helsinki isə Moskvadan cəmi iki saatlıq uçuş məsafəsində yerləşir. Yəni Putin final oyunundan sonra rahatlıqla görüşə gələ biləcək.

Müəllifin yazıdğına görə, Rusiyanın hiyləgər lideri bundan təbliğat gedişlərini həyata keçirmək üçün istifadə edə bilər .
Belə ki, o, Rusiyada keçirilən və hər kəsin diqqət mərkəzində olan futbol üzrə dünya çempionatını qapadıqdan cəmi bir gün sonra Donald Trampla müzakirələrə başlayacaq.

Həmin görüşün də qlobal medianın bir nömrəli mövzusuna çevriləcəyi heç kimdə şübhə doğurmur...