Suriyadan ABŞ-ın istəyi ilə
çıxası deyilik - İran
ABŞ-la danışıqlar aparmasının İran üçün heç bir əhəmiyyəti yoxdur.
Axar.az xəbər verir ki, bunu "Valday” klubunda çıxışı zamanı İran Ali dini liderinin müşaviri Əli Əkbər Vilayəti deyib.
"Danışıqlar üçün heç bir əsas yoxdur. Güvənilməsi mümkün olmayan insanla necə danışıqlar aparmaq olar”, – deyə o bildirib.
Onun sözlərinə görə, İran gərək onunla imzalanan nüvə razılaşmasından fayda götürsün, əks təqdirdə bu razılaşmanın heç bir əhəmiyyəti yoxdur:
"Öhdəliklərimizi pozmuruq və razılaşmaya sadiqliyimizi davam etdiririk. İran bu razılaşmanı öz nüvə fəaliyyətini məhdudlaşdırmaq qarşılığında iqtisadi fayda götürmək üçün imzalayıb. Amerikalılar öz öhdəliklərini daim pozurlar. Biz bu razılaşmadan iqtisadi fayda götürməliyik. Burada qalıb, fayda götürməməyin mənası yoxdur”.
O, İranın Suriyadakı mövcudluğunu qoruyub saxlayacağını da söyləyib:
"İran hərbi məsləhətçiləri Suriyada qalacaq. Biz olmasaq, buradan Rusiya da gedəcək və terrorçular yenidən aktivləşəcək. İran Suriyada Dəməşqin dəvəti ilə vuruşur. Bizi ABŞ bura dəvət etməyib ki, o da buradan getməyimizi istəsin.
Suriyadakı mövcudluğumuzun İsraillə heç bir əlaqəsi yoxdur”.
