Təhsil eksperti və DİM qarşıdurması -hər iki tərəf özünü haqlı sayır
596 bal topladığını halda tələbə adını qazanmadığını iddia edən abituriyent İbrahim Əsgərinin məsələsi Dövlət İmtahan Mərkəzi(DMİ) ilə təhsil eksperti Kamran Əsədov arasında yaranmış qalmaqal səngimir. DİM Kamran müəllimi məhkəmə verəcəyini bildirib.
Məsələ ilə bağlı müsavat.com-a danışan təhsil eksperti K.Əsədov bildirir ki, ona avqustun 15-i, saat 18:50-də abituriyentin valideynləri tərəfindən müraciət olub:"Zəng edib dedilər ki, övladımız qəbul imtahanlarında 596 bal toplayıb ixtisas seçimi etsə də heç bir yerə qəbul ola bilməyib. Baxmayaraq ki, o öz balından aşağı olan yerləri seçmişdi. Elektron ərizəsi göndərmələrini xahiş edim. Onlar da mənim votsap ünvanıma İbrahim Əsgərinin 529 və 596 bal topladığı və 15 ixtisas seçimi etdiklərini əks etdirən sənədin "screen” edilmiş nüsxə şəklini göndərdilər. Məsələ məndə təəccüb yaratdığı üçün onların öz razılığı ilə feysbuk səhifəmdə paylaşdım. Məqsəd məndən daha təcrübəli olan şəxslərdən məsələnin nə yerdə olduğunu öyrənmək idi. Bu məsələ ilə bağlı yazdığım status da hələdə qalır. Həmin statusdan bir az sonra DİM-in əməkdaşı əvvəlcə mənə zəng edərək, sonrada SMS yazaraq təkzib yazmağımı, bu olmayacağı təqdirdə məni məhkəməyə verəcəyini, dedi. Mənə bildirdilər ki, abituriyentin mənə təqdim etdiyi sənədin fotoşopdur. Bunun ardınca mən iki dəfə DİM-in bu məsələ ilə bağlı mövqeyini əks etdirən status yazdım. Baxmayaraq ki, DİM tərəfindən mənə təkzib etmək üçün heç bir tutarlı sənəd, sübut təqdim edilməmişdi. Hətta indiyə qədər də mənə abituriyentin həqiqi nəticəsinin neçə olduğu barədə heç bir məlumat verilməyib. Mən şifahi qaydada deyilən hansısa bir informasiya ilə bağlı təkzib verməli idim? Baxmayaraq ki, iki dəfə bu məsələ ilə bağlı DİM-in mövqeyini eyni profildə yazaraq qeyd etmişəm”
K.Əsədov məsələ ilə bağlı abituriyent, onun
valideynləri ilə saat 12 radələrində DİM-in inzibati binasının qarşısında
görüşdüklərini deyir:"Sonra DİM -in əməkdaşı ilə görüşdük
və şifahi qaydada bu sənədin saxta - fotoşop olduğunu bildirdi və bizi saat 3-də
keçiriləcək mətbuat konfransına dəvət etdi. Saat 15:00-da DİM-in inzibati
binasında həmin abituriyentin ailə üzvlərinin və KİV nümayəndələrinin iştirakı
ilə mətbuat konfransı keçirildi. Burda DİM rəhbəri iddia edir ki, mən təkzib
verməmişəm. Halbuki mətbuat konfransı saat 15:00-da başlayıb və mən buna qədər
DİM-in mövqeyinin əks olunduğu və KİV-lərdə də gedən iki status yazmışdım. Üstəlik
abituriyentin iddiasının əsassız olduğunu əks etdirən hansısa bir sənəd təqdim
etməmişdi ki, o sənəd əsasında mən daha geniş münasibət bildirim. Valideynlər tərəfindən
mənə verilmiş istifadəçi adı və parol ilə onun elektron ərizəsinə girmək mümkün
deyildi və bu barədə də DİM rəhbərliyinə mətbuat konfransında bildirdim. Mən
bununla bağlı kiməsə müraciət etməyə məcbur və borcu deyiləm. Çünki vaxtı ilə
DİM-ə, Təhsil Nazirliyinə kifayət qədər yazılı, elektron formada məktub, müraciət
etmişəm və onlara heç bir cavab gəlməyib. Düzdür, müəyyən vaxtlarda şəxsi
telefon ilə onların əməkdaşları ilə mənə olunan müraciətlərlə bağlı sual
ünvanlayanda operativ cavab verib, həll ediblər. İndi DİM iddia edir ki,
onların nüfuzuna xələl gətirmişəm. Mən bu məsələ ilə bağlı DİM-in nüfuzuna
hanısa bir xələl gətirdiyimi düşünmürəm. Çünki DİM-in mənə abituriyentin həqiqi
nəticəsi ilə bağlı rəsmi sənəd təqdim etməməsinə baxmayaraq onların mövqeyinin əks
etdirən status yazmışam. Təkrar edirəm ki, onlar mətbuat konfransı keçirənə qədər
bu barədə yazmışam”.
Dövlət İmtahan Mərkəzinin (DİM) mətbuatla iş və
elektron kommunikasiya sektorunun müdiri Xanlar Xanlarzadə qəzetimizə
açıqlamasında deyir ki, KİV-də, xüsusən də feysbukda abituriyentin 596 bal
topladığı halda ali təhsil müəssisələrinə qəbul olmaması haqda "skreen” olunmuş
elektron ərizə forması paylaşılmışdı:"Paylaşan təhsil
eksperti Kamran Əsədov idi. Elə bir təəssürat yaradılır ki, abituriyent yüksək
bal toplasa da hər hansı bir ixtisasa yerləşdirilməyib. Biz dərhal bu məsələni
araşdırdıq. Məlum oldu ki, həmin o paylaşılan ərizə forması saxtadır. Müəyyən
kompüter proqramlardan istifadə etməklə onu düzəltmək, yəni balı dəyişmək olar.
Dəyişdirilmiş materialı da Kamran müəllim öz feysbuk səhifəsində paylaşıb. Bu,
bizim işgüzar nüfuzumuza zərbədir. Məsələnin əsl mahiyyəti belədir ki, həmin
abituriyentin yaz imtahanında 410 bal, yay imtahanında 451 bal toplayıb. Dövlət
İmtahan Mərkəzinin rəhbərliyinin də iştirakı ilə mətbuat konfransı keçirtdik. Mətbuat
nümayəndələrini, Kamran müəllimi və həmin abituriyentin ailəsini də dəvət
etdik. Abituriyentin nəticələri ilə bağlı məlumatlar onun şəxsi səhifəsində
var. Nə qədər bal toplayıb və s. Abituriyent özü istifadəçi adı və şifrəni
yazıb öyrənə bilər. Abituriyentin ailəsi DİM-ə müraciət etsə, onlara imtahanda
istifadə olunmuş cavab kartını təqdim edə bilərik. Kamran müəlliminlə bağlı rəhbərlik
qərar verəcək, məhkəməyə veriləcək, ya yox”.
Ləman Mustafaqızı, musavat.com