Bu barədə 79 saylı İmişli seçki dairəsindən deputatlığa namizəd, Müsavat Məclisinin üzvü İltizam Əkbərlimusavat.com-a məlumat verib. Onun dediyinə görə, bülletenlərdə YAP namizədi Əsabil Qasımovun adının qarşısında səs vermək işarəsi qoyulubmuş. Bülletenlərin geri alınması üçün DSK sədrinin, hətta rayon rəhbərliyinə daxil olan şəxslərin ona xahiş etdiyini deyən İltizam Əkbərli bildirib ki, bülletenləri geri verməyib. Çünki həmin bülletenləri sübut kimi müvafiq strukturlara şikayətinə əlavə edəcək.  İ.Əkbərli Hacıalmuradlı kəndindəki seçki məntəqəsində də seçki komissiyası üzvünün qutuya Əsabil Qasımovun xeyrinə 7 bülleten atdığını qeydə aldıqlarını məlumat verib: "Biz bu cür saxtakarlıq faktını qeydə alana zaman seçki komissiyasının sədri mənim üzərimə hücum etdi. Polis çağırdı və məni saxladılar. Mən namizəd olaraq hüquqlarımı onlara desəm də xeyri olmadı. Mən DSK sədrinə müraciət etdikdən sonra məndən əl çəkdilər”.

İmişli rayonunun Hacırüstəmli kəndindəki 39 saylı məntəqədə isə kənd icra nümayəndəsi Yavər Şıxəliyev müşahidəçilərin gözü qarşısında qutuya nümayişkaranə surətdə 4 bülleten atıb. Bunu isə "Azadlıq” Radiosuna namizədliyi AMİP tərəfindən irəli sürülmüş Tapdıq Həsənov verib. Onun dediyinə görə, digər məntəqələrdə də qutulara topa bülleten atılması halları müşahidə edilir.

İmişli RİH başçısının Hacırüstəmli kənd inzibati ərazi dairəsi üzrə nümayəndəsi Yavər Şıxəliyev isə barəsində səslənən iddiaları təkzib edib: "Mən həqiqətən seçki məntəqəsində olmuşam. Amma digər seçicilər kimi cəmi 1 bülleten alıb, onu işarələyərək qutuya atmışam. Oradakı müşahidəçilər bükülmüş bülleteni açıb onlara göstərməyimi istəyirdilər. Bu, qanunsuz tələbdir, səsvermənin gizliliyi pozula bilərdi. Görünür, əlləri hər yerdən üzülüb, keçiblər böhtan atmağa, qarayaxmaya. Çox yaxşı seçki keçir, hər şey də öz qaydasındadır”.