Güney Azərbaycanda bir neçə tanınmış milli-mədəni fəal mayın 19-dan aclıq aksiyasına başladıqlarını bəyan ediblər. Onlar hazırda həbsdə olan Abbas Lisani, Ayət (Yürüş) Mehrəlibəyli, Rəsul Rəzəvi, Hüseyn Əliməhəmmədi, Murtaza Muradpur və Lətif Həsənidir. Milli-mədəni fəalların aclıq aksiyası keçirməsinə səbəb mayın 18-də azadlığa buraxılmalı olan azərbaycanlı fəal Abbas Lisaninin həbs müddətinin yenidən artırılması olub.
Musavat.com xəbər verir ki, bu barədə Teleqram sosial şəbəkəsində məlumat yayılıb. Məlumata əsasən Şirazın Adilabad zindanında 1 illik həbs cəzasını çəkən Abbas Lisani ötən gün həbs müddəti başa çatdığı üçün azadlığa çıxmalı idi. Lakin azərbaycanlı fəal barədə yeni məhkəmə qərarı çıxarılıb və həbs müddəti uzadılıb. Abbas Lisani azadlığa çıxmasına maneçilik yaradıldığı üçün əvvəlcədən elan etdiyi kimi mayın 19-dan aclıq aksiyasına başlayıb. Digər həbsdə olan azərbaycanlı milli-mədəni fəallar ona dəstək olmaq üçün aksiyaya qoşulublar.
Xatırladaq ki, Abbas Lisani 2011-ci ildə Urmiya gölünün ekoloji durumu ilə bağlı Ərdəbildə keçirilən etirazlardan sonra saxlanılmışdı. Ötən ilin may ayında milli-mədəni fəala bir il həbs cəzası verilmişdi.
Qeyd edək ki, Abbas Lisani vaxtilə hüquq müdafiə üzrə nüfuzlu Amnesty İnternational kampaniya təşkilatı tərəfindən vicdan məhbusu kimi tanınıb. Abbas Lisani bundan öncə də milli fəallığına görə dəfələrlə həbs olunub.
