İctimai Səhiyyə İnstitutu İctimai Birliyinin sədr müavini, həkim Vəfa İbrahmova ilə ölkə səhiyyəsinin mövcud durumu ilə bağlı Uluyol.info olaraq fikirlərin öyrəndik.
-Artıq xarici mətbuatda Azərbaycan səhiyyəsinin bərbad durumu müzakirə edilməyə başlanılıb. Sizcə vəziyyət doğrudanmı belə dəhşətlidir?
-Təəssüf ki, yazılanlarla
razılaşmamaq olmur. Azərbaycan səhiyyəsi problemlər girdabında batır.
Soydaşlarımızın müalicə üçün başqa
ölkələrə getməsi təkcə yerli səhiyyə ocaqlarına etimadsızlıqla bağlı deyil. Dünyanın
hər yerində xaricə müalicəyə getmək praktikası var. Amma Azərbaycanda müalicəyə
gedənlərin sayı həddindən artıq çoxdur. Hər halda, bununla bağlı ciddi düşünmək
lazımdır. Hesab edirəm ki, burada bir neçə faktorlar mövcuddur. Burada
peşəkarlıqla bağlı olaraq, etimadsızlıq məsələsi də var. Bir az millətin özündə
də xarici mütəxəssisləri özümüzünkülərdən üstün tutmaq məsələsi də var. Bir də
müalicənin İranda daha ucuz başa gəlməsi faktoru da mövcuddur. Yəni,
sadaladığım üç faktor bu miqrasiyada böyük rol oynayır. Son illər səhiyyə sahəsində müəyyən irəliləyişlər olsa da, xeyli sayda
problemlər var. Azərbaycandakı
mütəxəssislərin böyük qismi sovet dövrünün yetişdirdiyi kadrlardır. Təbii ki,
onlar arasında da peşəkarlar çoxdur. Amma sovet səhiyyə sistemi ilə Qərb
səhiyyəsi arasında xeyli fərq var. Qərb səhiyyəsi daha avantajlı, daha inkişaf
etmiş, daha üstün səhiyyədir. Hesab edirəm ki, biz tədricən Qərb səhiyyəsinin
standartlarını mənimsəməliyik. Bununla bağlı, müəyyən işlər görülür. Xaricdə
uzmanlar, xüsusi sahələr üzrə mütəxəssislər hazırlanır, amma bunlar yetərli
deyil. Onlar regionlara da paylanmalıdırlar, bütün Azərbaycan üzrə təyin
olunmalıdırlar ki, bizim səhiyyəmiz Qərb standartlarına uyğunlaşa bilsin. Yəni,
kadr potensialı olduqca vacibdir. Ambulator sistemə keçmək, xəstənin
stasionarda çox yatışını azaltmaq və s. məqamlar Qərb standartlarının əsas
istiqamətləridir ki, biz də tədricən ona keçməliyik.
Səhiyyə sahəsində aparılan islahatlar zəif aparılır, görüləsi xeyli işlər var. Məsələn, sığorta təbabəti ilə bağlı xeyli söhbətlər getsə də, məsələ indiyə qədər öz həllini tapmayıb. Səhiyyənin maddi-texniki bazasında xeyli möhkəmlənmələr var. Azərbaycanda olan avadanlıq İranın əksər klinikalarında yoxdur, onların özləri də bunu etiraf edirlər. Təəssüflər olsun ki, xalq bunlardan yetərincə faydalana bilmir. Bax, əsas problem də budur.
-Bu sahədə irəliyişlərə nail olmaq üçün nə etmək lazımdır?
-İlk
növbədə tibbi sığortanın tətbiqinə tezliklə başlamaq lazımdır. Qonşu Gürcüstan
tibbi sığortanın tətbiqi ilə bu sahədə əhəmiyyətli irəliləyişlərə imza atıb.
Artıq bir çox vətəndaşlarımız müalicə üçün bu ölkəyə üz tutur. Tibbi fəaliyyətin tənzimlənməsi
sahəsində mövcud qanunverici baza isə müasir tələblərə cavab vermir. Tibbi sığortanın tətbiqindəki lənglik, pullu
və pulsuz səhiyyə arasında sərhəddin nisbiliyi, səhiyyə kontingentinin əmək
haqlarının gülünc səviyyədə aşağı olması, korrupsiya və rüşvət, proteksiya
halları səhiyyə sahəsində problemləri artırır.
Etiraf etmək lazımdır ki, bir sıra müsbət xarakterli təşəbbüslər də olub. Lakin
ümumi problemlər ucbatından hətta külli miqdarda yatırımlar belə, effektiv
olmur. Təəssüf ki, məmur ordusunda müvəqqətilik sindromu var. Elə bil vəzifəyə
hamı bir fürsət kimi yanaşır. Ona görə də əsaslı deyil, taktiki qərarlar qəbul
edilir. Fikrimcə, ayrı götürülmüş bir sahədə inqilab yaratmaq çətindir. Çünki
səhiyyənin inkişafı üçün digər sahələrdən dəstək olmalıdır.
Səhiyyənin inkişafı ilk növbədə təyin olunan kadrlardan asılıdır. Proteksiya aradan qaldırılmalı, kadrlar region, qohumluq, şəxsi əlaqə prinsipi ilə deyil, bacarıq və kompetensiya meyarı ilə təyin olunmalıdır: Tibb təşkilatçıları nazirlik dəstəyinə və bütövlükdə hökumətin tam dəstəyinə malik olduqdan sonra planlı inkişafa aparan fəaliyyət göstərməlidirlər.
Pasientlərin xaricə axını yalnız cənuba doğru deyil. İmkanı zəif olanlar özlərini İran həkimlərinə təslim etsələr də, İsrail, Türkiyə, ABŞ, Avropa səhiyyəsinə müraciət edənlər də çoxdur. İrana müraciət əsasən, qiymətlərin bizim qiymətlərdən xeyli aşağı olması, orada farmasiyanın, yəni dər-man sferasının nəzarətdə olması, keyfiyyətli dərman təminatı səbəbindəndir. Etiraf etmək lazımdır ki, qapalı şəraitdə inkişaf etməsinə baxmayaraq, İran səhiyyəsi bir sıra sahələr üzrə inkişafa nail ola bilib. İrana il ərzində tibbi yardım üçün gedənlərin sayı barədə müxtəlif rəqəmlər səsləndirilir. Əgər bu rəqəm ortalama 500 mindirsə və hər pasient müşayiət edənlərlə birlikdə ən aşağı dəyərləndirmə ilə 1000 ABŞ dolları xərcləyirsə, bu, il ərzində dövriyyəmizdən 0,5 mlrd. vəsaitin çıxması deməkdir. Bu rəqəmin üzərinə digər ölkələrdə tibbi ehtiyaclar - dərman preparatları və avadanlıqları üçün xərclənən vəsaitləri gəldikdə isə, hər il iqtisadi maraqlarımıza dəyən maddi zərərin həcmini görərik. 1990-cı illərin ortalarında Azərbaycanın dövlət büdcəsinin 200-300 milyon olduğunu yada salsaq, səhiyyənin bu günkü faciəsinin miqyası aşkar görünər.
Uluyol.info
Tural İNTİQAM