Bu şəkil bu gün İsveçin paytaxtı Stokholmda çəkilib.Şəkildə gördüyünüz kişi İsveç parlamentinin - riksdağın sədri Urban Ahlindir.
Onun önündəki əli çəkicli oğlan isə keçmiş əməkdaşımız Rahib Kazımlının oğlu Sahibdir.
Sahib Stokholmda orta məktəbin 6-cı sinfində əla qiymətlərlə oxuyur, məktəbinin iki simvolundan biridir (o birisi isveçli qızdır), iri şəkli məktəbin əsas korpusunun foyesində vurulub.
Bu gün o və digər əlaçı şagirdlər İsveç parlamentində olub, deputatlarla, parlamentin sədri ilə görüşüblər.Urban Ahlin öz kreslosunu və ədalətli polemika rəmzi olan 140 illik çəkici Sahibə etibar edib.
Şagirdlər parlamentin plenar iclasında iştirak edərək, deputatların ölkənin problemləri ilə bağlı müzakirəsinə qulaq asıblar.
Bu, Avropanın əksər ölkələrində, eləcə də ABŞ-a daxil olan ştatlarda bir qaydadır, şagirdləri tez-tez parlamentə aparır,onların ciddi məsələlərə dair iclaslarda müzakirələrə qulaq asmalarını təmin edirlər.
Bununla da uşaqlarda həm siyasətə,dövlət, cəmiyyət işlərinə maraq oyadırlar,onların əsl vətəndaş kimi yetişməsinə çalışırlar.
Dövlət xadimlərinin öz gələcək siyasi xələflərinə necə ehtiramla davranması spiker Urban Ahlinin fotokamera önündə verdiyi pozadan bəllidir. (musavat.com)