“Sabah” futbol klubunun Çempionlar Liqasının əsas mərhələsinə yüksəlməsi Avropa futbolunda gözlənilməz uğur kimi qiymətləndirilir.
Musavat.com xəbər verir ki, bu barədə “Euronews” kanalının yayımladığı məqalədə deyilir.
Bildirilir ki, klub Bakı klubu 2017-ci ildə yaradılmasına baxmayaraq, qısa müddətdə ölkənin aparıcı komandalarından birinə çevrilib.
“Sabah” pley-off mərhələsində İsrailin “Hapoel Beer Şeva” klubunu iki oyunun nəticəsinə görə 6:4 hesabı ilə məğlub edərək Çempionlar Liqasının əsas mərhələsinə vəsiqə qazanıb.
Bununla da klub tarixində ilk dəfə Avropanın ən nüfuzlu klub turnirinin əsas mərhələsində mübarizə aparmaq hüququ əldə edib.
Komandanın baş məşqçisi Valdas Dambrauskasın futboldakı karyerasının başlanğıcı da maraqlı tarixçəyə malikdir. O, 2002-ci ildə Litvada televiziya viktorinasında pul mükafatı qazandıqdan sonra İngiltərəyə gedərək UEFA-nın məşqçilik kurslarında iştirak edib. Daha sonra İngiltərənin “Fulhem” və “Brentford” klublarında, eləcə də “Mançester Yunayted”in akademiyasında çalışıb.
“Sabah” əsas mərhələdə “Barselona”, Dortmund “Borussiya”, “Napoli”, “Arsenal” və “Mançester Yunayted” kimi Avropanın nəhəng klubları ilə qarşılaşacaq.
Klubun uğurunun arxasında böyük maliyyə xərclərindən daha çox düzgün transfer siyasəti, statistika və analitik məlumatlardan istifadə dayandığı vurğulanır.
“Sabah”ın Çempionlar Liqasına yüksəlişi Azərbaycan futbolunun beynəlxalq arenadakı mövqeyinin güclənməsi baxımından da mühüm addım hesab olunur.
