Ukrayna ordusunun pilotsuz sistemlər qüvvələrinin komandanı Robert Brovdi gecə ərzində yeni bir hücum barədə məlumat verərək bildirib ki, Azov dənizində Rusiyaya məxsus daha 15 gəmi vurulub.
Tribuna.az xarici mediaya istinadla xəbər verir ki, Brovdinin sözlərinə görə, hədəflər yeddi tanker, beş toplu daşıyıcı, bir bərə və iki yedək gəmisi idi.
Komandan yazıb ki, Krım yarımadasının yük daşıma infrastrukturu hər gecə vurulur, boğazdan nəqliyyat dayandırılıb və yük boşaldılması minimuma endirilib.
O, iyulun əvvəlindən bəri Rusiya kölgə donanmasının gəmilərinə müntəzəm olaraq hücumlar barədə məlumat verir. Onun iddiasına görə, 8 gün ərzində Rusiyanın 105 yük gəmisi vurulub.
Rusiya tərəfi bütün zərbələri təsdiqləməyib. Rostov vilayətinin qubernatoru Yuri Slyusar Taqanroq körfəzində yalnız bir neçə tankerin zədələndiyini bildirib.
