Çin alimləri danışıq qabiliyyətini itirmiş xəstələr üçün beyin-maşın interfeysi (BMI) əsasında yeni texnologiya hazırlayıblar.

Çin Beyin Tədqiqatları İnstitutu, Pekin Paytaxt Tibb Universiteti və “NeuCyber NeuroTech” şirkətinin birgə inkişaf etdirdiyi sistem beyin transplantasiyası xəstələrinin beyninə inteqrasiya edilib və uğurlu nəticələr əldə olunub. Bu texnologiya iflic olan xəstələrə kompüterləri və robot qollarını idarə etmək imkanı da verir.
Yeni “NeuCyber Matrix BMI System” adlı sistem ALS və afaziya kimi nevroloji xəstəliklər səbəbindən danışmaq qabiliyyətini itirmiş bir xəstəyə tətbiq edilib. Martın 14-də başlayan məşqlər zamanı xəstənin dil anlama bacarıqlarında sürətli inkişaf qeydə alınıb. İlk üç saatda anlama nisbəti 34% olduğu halda, zamanla bu göstərici 52%-ə yüksəlib.

Tədqiqatçılar bildirirlər ki, bu inqilabi texnologiya gələcəkdə epilepsiya, iflic, onurğa beyni zədələri və digər nevroloji xəstəliklər üçün klinik tətbiqlərdə də istifadə edilə bilər. Beyin-maşın interfeysinin sinir sistemi xəstəlikləri ilə mübarizədə böyük potensiala malik olduğu vurğulanaraq, daha geniş istifadəsi üçün araşdırmalar davam etdiriləcək.//E-saglam.az