Danimarka və Finlandiyadan olan tədqiqatçılar döymə (tatuaj) ilə xərçəng arasında illərdir davam edən müzakirəyə dair yeni elmi nəticələr açıqlayıblar.

Milli.Az xəbər verir ki, araşdırma çərçivəsində 2367 əkiz bacı üzərində aparılan təhlillərə əsasən, ovuc içindən böyük ölçüdə döyməyə sahib şəxslərdə dəri xərçəngi riski 2,7 dəfə artır. Bu nəticə döymənin ölçüsünün də risk faktorlarından biri ola biləcəyini göstərir.

İstanbul Universiteti Cerrahpaşa Tibb Fakültəsi Dəri və Zöhrəvi Xəstəliklər Bölümündən Prof. Dr. Zekayi Kutlubay döymənin xərçəngə səbəb olan dəqiq mexanizminin hələ də tam bilinmədiyini qeyd edərək bildirib:

“Tatu mürəkkəbinin keyfiyyəti risklə birbaşa əlaqəlidir. Tatu etdirmək istəyənlər istifadə olunan mürəkkəbin sertifikatlı, tərkibi açıq şəkildə göstərilən və etibarlı markalardan olan məhsullardan istifadə olunduğuna əmin olmalıdırlar. Həmçinin prosedur steril şəraitdə həyata keçirilməlidir.”

Dermatologiya mütəxəssisi Dr. Emre Araz isə qeyd edib ki, döymələrdə ən çox istifadə edilən qara mürəkkəb karbon qarasından ibarətdir və bu maddə Beynəlxalq Xərçəng Araşdırmaları Agentliyi tərəfindən “kanserogen” olaraq tanınıb.

Danimarkada aparılan əlavə tədqiqat döyməli şəxslərdə:

Dəri xərçəngi riskinin 62% daha yüksək olduğunu,

Lenfoma riskinin isə iri ölçülü döymələrdə 27 dəfə artdığını göstərib.

Bu təhlükələri nəzərə alan Avropa Birliyi 2022-ci ilin yanvarından etibarən döymə və qalıcı makiyaj boyalarında minlərlə kimyəvi maddənin istifadəsini məhdudlaşdırıb.

Dermatologiya üzrə mütəxəssis Dr. Dilek Akça isə belə əlavə edib:

“Qara mürəkkəb hissəcikləri limfa sistemində toplanaraq lenfoma kimi xəstəliklərlə əlaqələndirilir. Döyməli dəri günəş şüalarına məruz qaldıqda bu maddələr reaktiv reaksiyaya girə və DNT zədələnməsi baş verə bilər. Bu səbəbdən döyməsi olan şəxslər günəşdən qoruyucudan istifadə etməli və UV şüalarından mümkün qədər uzaq durmalıdırlar.”