Fransanın Ermənistandakı səfiri Olivye Dekontini ötən gün bu ölkənin İctimai Televiziyasına müsahibə verib. Tribunainfo.az xəbər verir ki, fransız səfir bir çox məsələlərə, o cümlədən Azərbaycanla bağlı mövzulara da toxunub.

Dekontini deyib ki, Minsk Qrupunun buraxılması məsələsini əslində təkcə iki münaqişə tərəfi deyil, həmsədr ölkələr də həll etməlidirlər. Onun sözlərinə görə, həmsədr ölkələrinin hansı qərar verəcəyi bəlli deyil.

Fransız səfir Ermənistan-Fransa hərbi əməkdaşlıq məsələsinə də toxunub. O qeyd edib ki, bu istiqamətdə əlaqələr güclənib. Diplomat əlaqələrin üç istiqamətdə inkişaf edəcəyini də vurğulayıb. “Bu əlaqələrin üç əsas istiqaməti olacaq ki, onlardan birincisi Ermənistanın müdafiə avadanlığı ilə təmin olunmasıdır. İkinci istiqamət həm Ermənistanda, həm də Fransada erməni hərbi kadrlarının hazırlanmasıdır. Üçüncü istiqamət Ermənistan Müdafiə Nazirliyinə göstərilən məsləhət xidmətləridir ki, bu da ona Ermənistan ordusunda islahatlar aparmağa və gücləndirməyə imkan verəcək”.

Dekontini iddia edib ki, Azərbaycan Ermənistana qarşı hərbi vasitələrdən istifadə edə bilər. “Təbii ki, narahatlığa əsas var. Çünki sülh müqaviləsi olmadığı müddətdə silahlı qarşıdurma ehtimalı həmişə var”.

O bildirib ki, sərhəddə Avropa Müşahidə Missiyasının olmasının guya, Azərbaycana da xeyri var. “Azərbaycana da Azərbaycan tərəfində missiya yerləşdirmək təklif edilib, lakin Azərbaycan bundan imtina edib”.

Fransız səfir yekunda Qarabağın Ermənistan tərəfindən Azərbaycanın ərazisi olması məsələsinin Praqada tanınması mövzusuna da toxunub. “2022-ci ildə Praqada Qarabağın Azərbaycanın tərkib hissəsi kimi tanındığını iddia edənlər yalan danışırlar. Çünki Alma-Ata bəyannaməsindən sonra Dağlıq Qarabağ Ermənistan tərəfindən Azərbaycanın tərkib hissəsi kimi tanınıb”.