Şimali Koreya 2025-ci ilin yanvar və fevral aylarında Rusiyaya əlavə 3000 hərbçi göndərib. Bu haqda Associated Press Cənubi Koreyanın Birləşmiş Qərargah Rəislərinin hesablamalarına istinadən xəbər verir.

Məlumata görə, Pxenyan həmçinin Moskvaya çox sayda raket, artilleriya avadanlığı və sursat göndərir və cəbhədəki vəziyyətdən asılı olaraq silah təchizatını artıra bilər.

Cənubi Koreya iddia edir ki, Şimali Koreyanın Rusiyaya tədarük etdiyi sursat və hərbi texnika arasında “əhəmiyyətli sayda” qısa mənzilli ballistik raketlər, 170 mm-lik özüyeriyən haubitsalar və 220-yə yaxın 240 mm-lik reaktiv sistemləri var.

Bundan əvvəl Cənubi Koreya KİV-i kəşfiyyat mənbələrinə istinadən xəbər vermişdi ki, KXDR-dən əlavə 3 minədək hərbçi Rusiya Federasiyasına gəlib.

İndiyədək Şimali Koreya Ukraynaya qarşı müharibədə iştirak etmək üçün Rusiyaya 11-12 min əsgər göndərib. Kursk vilayətində gedən döyüşlərə KXDR hərbçiləri cəlb edilib.

Yanvar ayında Ukrayna prezidenti Vladimir Zelenski Şimali Koreyanın 4000-ə yaxın əsgərinin öldüyünü və yaralandığını demişdi. Şimali Koreyanın itkiləri ilə bağlı eyni təxminləri indi Cənubi Koreyanın Birləşmiş Qərargah Rəisləri təqdim edib.