Araşdırmalara görə, iş həyatında inkişafın qarşısını alan əsas amillərdən biri yalnız peşə bacarıqlarının çatışmazlığı deyil, eyni zamanda ünsiyyət problemləri və sosial davranış qaydalarına əməl edilməməsidir.
Görüşlərdə telefondan istifadə etmək mənfi təsir yaradır
Mütəxəssislər bildirirlər ki, görüş zamanı, yeməkdə və ya vacib söhbət əsnasında telefona baxmaq qarşı tərəfdə laqeydlik hissi yarada bilər. Xüsusilə iş mühitində bu davranış insan haqqında mənfi ilk təəssürat formalaşdıra bilər. Bu səbəbdən telefonun səssiz rejimə keçirilməsi, ekranı aşağı çevrilməsi və ya vacib görüşlər zamanı ümumiyyətlə kənarda saxlanılması tövsiyə olunur.
Maddi məsələlərdə məsuliyyətli davranmaq vacibdir
Dostlarla keçirilən görüşlərdə və qrup fəaliyyətlərində davamlı olaraq başqalarının ödəməsini gözləmək münasibətlərə zərər verə bilər. Mütəxəssislər qeyd edirlər ki, maddi çətinlik olduqda bunu əvvəlcədən açıq şəkildə bildirmək və uyğun alternativlər təklif etmək daha düzgün yanaşmadır.
Daim təxirə salınan “sonra mən ödəyərəm” vədlərinin isə zamanla etimad itkisinə səbəb ola biləcəyi vurğulanır.
Tənqid zamanı düzgün üslub seçmək önəmlidir
Mütəxəssislərin fikrincə, sərt və dağıdıcı tənqid əvəzinə konstruktiv yanaşma insanlarla daha sağlam münasibət qurmağa kömək edir.
“Bu çox pisdir” ifadəsi əvəzinə “bu hissə daha yaxşılaşdırıla bilər” kimi yanaşmalar həm peşəkarlığı, həm də liderlik bacarıqlarını göstərir.
“Təşəkkür edirəm”, “üzr istəyirəm” və “xeyr” deməyi bacarmaq lazımdır
Mütəxəssislər bildirirlər ki, minnətdarlıq bildirmək, səhv olduqda üzr istəmək və lazım gəldikdə “xeyr” deməyi bacarmaq yetkin davranışın əsas göstəricilərindəndir.
Bu ifadələri düzgün və səmimi şəkildə istifadə edən insanların həm iş, həm də şəxsi münasibətlərdə daha güclü əlaqələr qurduğu qeyd olunur.
Ekspertlərin fikrincə, bu vərdişləri 30 yaşdan əvvəl formalaşdırmaq insanın daha sağlam sosial və peşəkar kimlik qurmasına kömək edir.//Demokrat.az
