2026-cı ilin iyun ayının sonlarında Avropa ölkələrini bürüyən rekord istilər zamanı 10.000-dən çox ölüm qeydə alınıb.
Musavat.com xarici mediaya istinadla xəbər verir ki, ölümlərin 9000-dən çoxu 65 və yuxarı yaşda olanlar olub. EuroMOMO-nu əlaqələndirən Danimarkanın Statens Serum İnstitutunun baş tibb işçisi Lasse Vestergaard bildirib ki, ölümlərin bu qədər artması ilin bu vaxtı üçün qeyri-adi hesab olunur.
“Həddindən artıq ölümün bu qədər yüksək səviyyəsini aşırı istilərdən başqa bir şeylə izah etmək çətindir”, – deyə o bildirib.
Statistika 22-28 iyun tarixləri arasında 27 Avropa ölkəsini əhatə edir və səbəbindən asılı olmayaraq bütün ölümləri əhatə edir. Lakin tədqiqatçılar qeyd ediblər ki, bu qədər kəskin artıma səbəb ola biləcək başqa məlum amillər yoxdur.
EuroMOMO ayrı-ayrı ölkələr üçün məlumat vermir, lakin qeyd edir ki, Fransa və Belçika iyun ayının son həftəsində “çox yüksək” artıq ölüm hallarının qeydə alındığı Avropada yeganə iki ölkədir.
Belçika ictimai səhiyyə institutu Sciensano-ya görə, Belçikada artıq ölüm halları 2000-ci ildən bəri isti dalğaları zamanı rekord səviyyədə olub.
Daha əvvəl Avropa İqlim Xidməti 2026-cı ilin iyun ayının Qərbi Avropada rekord səviyyədə ən isti ay olduğunu bildirmişdi. Fransa, Almaniya, İspaniya, İtaliya, Belçika, Hollandiya və Lüksemburqda aylıq göstəricilər orta səviyyədən 3-5 dərəcə yüksək olub.
