Dünya və Braziliya futbolunun əfsanəvi simalarından Roberto Karlosun İslam dinini qəbul etdiyi barədə məlumat yayılıb.
Musavat.com xəbər verir ki, bu barədə AK Partiyanın Qaziantepdən olan millət vəkili Ali Şahin Braziliyaya səfəri zamanı keçirdiyi görüşdən sonra məlumat verib.
Ali Şahin Braziliyanın San-Paulu şəhərində Şeyx Cihad Həmmadə və Braziliya İslam Xeyriyyəçi Gənclər Birliyinin nümayəndələri ilə görüşdüyünü bildirib. Görüş zamanı ölkədəki müsəlman icmasının fəaliyyəti və vəziyyəti ətrafında fikir mübadiləsi aparılıb.
Deputatın sözlərinə görə, Şeyx Cihad Həmmadə dünya futbolunun məşhur simalarından, vaxtilə Fənərbaxçanın da formasını geyinmiş Roberto Karlosun uzun müddətdir onunla əlaqə saxladığını deyib.
Həmmadənin verdiyi məlumata əsasən, Roberto Karlos təxminən dörd həftə əvvəl onu ziyarət edib və həmin görüş zamanı Kəlmeyi-şəhadət gətirərək İslam dinini seçib.
Ali Şahin bu xəbəri ictimaiyyətlə bölüşərək Roberto Karlosu təbrik edib, ona və ailəsinə sülh, sağlamlıq və bərəkətli həyat arzulayıb.
53 yaşlı Roberto Karlos futbol tarixinin ən məşhur sol cinah müdafiəçilərindən biridir. O, Braziliya millisinin heyətində 2002-ci ildə dünya çempionu olub, uzun illər Real Madriddə çıxış edib. Əfsanəvi futbolçu 2007-ci ildə Fənərbaxçaya transfer olunaraq Türkiyədə də böyük populyarlıq qazanıb.
