Bakıda “Fairmont Bakı” otelində yaşayan Türkiyə vətəndaşı iş adamının Azərbaycandan çıxışına məhdudiyyət qoyulub.
Qaynarinfo-nun məlumatına görə, nizamnamə kapitalı 100 min manat olan, qanuni təmsilçisi Sener Muratın olduğu “Daax Construction” MMC-nin Azərbaycanda fəaliyyət göstərən digər Türkiyə şirkətinə 1 702 079,12 ABŞ dolları məbləğində borcu yaranıb.
Sözügedən şirkətin məhkəməyə müraciəti əsasında müəyyən edilib ki, “Daax Construction” MMC-nin mülkiyyətində daşınar və daşınmaz əmlak yoxdur, lakin bəzi banklarda hesabları mövcuddur.
Şirkətin bank hesablarında olan vəsaitin tutulması məqsədilə inkasso sərəncamları tərtib edilərək müvafiq banklara göndərilib.
Bununla yanaşı, borclu hüquqi şəxsin rəhbərinin Türkiyə vətəndaşı olduğu və tez-tez ölkə hüdudlarını tərk etdiyi bildirilib.
Sener Muratın ölkədən getmək hüququnun müvəqqəti məhdudlaşdırılması ilə bağlı məhkəməyə müraciət olunub.
Məlum olub ki, 1966-cı il təvəllüdlü Sener Murat Bakı şəhəri, Səbail rayonu, Mehdi Hüseyn küçəsində yerləşən “Fairmont Bakı” otelində yaşayır.
Məhkəmənin qərarı ilə Türkiyə vətəndaşı olan iş adamının Azərbaycandan çıxışı müvəqqəti məhdudlaşdırılıb.
