Son bir ildə Rusiyada tikinti sahələrində miqrant işçilərin sayı artıb.
Musavat.com xarici mediaya istinadla xəbər verir ki, bu barədə Milli İnşaatçılar Assosiasiyasının (“NOSTROY”) prezidenti Anton Qluşkov məlumat verib.
Onun sözlərinə görə, hazırda bu sahələrdə təxminən 20.000 xarici işçi çalışır. Bu, son on ildəkindən təxminən beş faiz çoxdur.
Adətən, miqrantlar Orta Asiyadan gəlir. İndi onların arasında Özbəkistandan bir qədər çox, Tacikistandan isə bir qədər az işçi var. Bundan əlavə, Rusiya Hindistan, Pakistan, Banqladeş, Myanma və Vyetnam kimi ölkələrdən işçilər cəlb etməyə başlayıb.
Qluşkov həmçinin Sibir və Uzaq Şərqdə işləyən Şimali Koreyalı inşaat işçiləri barədə də fikirlərini bildirib. O, onların özlərini çox yaxşı göstərdiklərini deyib. “Onlar intizamlı olmaları, yüksək əmək məhsuldarlığı ilə seçilirlər, miqrasiya siyasətində problem yaratmırlar və Rusiya qanunvericiliyinə ciddi şəkildə riayət edirlər”, – Qluşkov bildirib.
Keçən ilin nəticələrinə görə, Rusiya Şimali Koreya vətəndaşlarına 36.413 viza verib ki, bu da bir il əvvəlkindən təxminən dörd dəfə çoxdur.
Qeyd edək ki, son illərdə Rusiyada miqrantlara qarşı qanunlar sərtləşdiriləndən sonra onlar yalnız ağır işlərdə, əsasən tikintidə işləməyə məcburdurlar.
