Havaların dəyişkən, əsasən isə isti keçməsi səbəbindən insanlar kondisionerlərdən daha çox istifadə etməyə başlayırlar. Lakin bəzi hallarda sərinləndiricilərdən həddindən artıq və ya düzgün qaydada istifadə olunmur.
Bəs kondisioner üçün sağlamlıq baxımından ən uyğun temperatur neçə dərəcə hesab edilir? Ondan düzgün istifadə edilməməsi hansı xəstəliklərin yaranmasına və ya mövcud xəstəliklərin kəskinləşməsinə səbəb ola bilər?
Həkim-terapevt Şahvələd Məmmədov Redaktor.az-a açıqlamasında bildirdi ki, kondisionerlərdən uzun müddət və düzgün qaydada istifadə olunmaması bir sıra sağlamlıq problemlərinə yol aça bilər.
“Həddindən artıq və düzgün istifadə olunmayan kondisionerlər göz xəstəliklərinə, əzələ, boyun və sinir ağrılarına, burunətrafı ciblərin iltihabı olan sinusit və haymoritə, bronx-ağciyər xəstəliklərinə, eləcə də astmanın kəskinləşməsinə səbəb ola bilər.
Kondisionerlərin otaq şəraitində 24-26 dərəcə temperaturda istifadəsi tövsiyə olunur. Bundan əlavə, qapalı məkanlarda kondisionerdən istifadə zamanı otağın müəyyən qədər havalandırılması vacibdir. Bu səbəbdən pəncərənin qismən açıq saxlanılması məsləhət görülür”.
Həkimin sözlərinə görə, kondisionerlərin filtrləri 4-6 həftədən bir təmizlənməlidir:
“Filtrlər vaxtında təmizlənmədikdə onların üzərində bakteriya və digər mikroorqanizmlər toplana bilər. Bu isə havaya yayılan mikroorqanizmlər vasitəsilə müxtəlif infeksion xəstəliklərin yaranma riskini artırır. Onlardan biri də Legionella pneumophila bakteriyasının törətdiyi legioner xəstəliyidir. Bu bakteriya ilə çirklənmiş su damcılarının nəfəs yolu ilə qəbul edilməsi ağır ağciyər infeksiyasına səbəb ola bilər”.
Aytəkin TOFİQQIZI
