Qazaxıstanda kitab oxumağı təşviq etmək məqsədilə böyük mükafat fondu olan qeyri-adi yarışa start verilib.
Musavat.com xəbər verir ki, ölkənin ən yaxşı 10 oxucusunun hər biri 10 milyon tenge mükafat alacaq. Bu, Qazaxıstan üçün kifayət qədər böyük məbləğdir. Belə ki, 10 milyon tengeyə ölkədə sıfır kilometr yeni avtomobil almaq mümkündür.
Layihə sentyabrın 1-də başlayıb. İştirakçılar yeddi kateqoriyaya bölünüb: məktəblilər, kollec tələbələri, ali məktəb tələbələri, müəllimlər, üç nəsli əhatə edən ailələr, dövlət qulluqçuları və digər vətəndaşlar.
Müsabiqə üçün ümumilikdə 345 kitabdan ibarət siyahı hazırlanıb. Hər bir iştirakçı öz kateqoriyası üzrə müəyyənləşdirilmiş siyahıdan 15 əsər oxumalıdır.
Kitab marafonu 2027-ci ilin martına qədər davam edəcək.
Regional seçimlərin nəticələrinə əsasən təxminən 4 min mükafatçı müəyyənləşdiriləcək. Onlardan 200 nəfər respublika finalına vəsiqə qazanacaq.
Finalçılar əyani müsahibədən keçəcək və ictimai çıxış zamanı oxuduqları ədəbiyyatı təhlil etmək bacarıqlarını nümayiş etdirəcəklər.
Yekunda ən yaxşı nəticə göstərən 10 oxucunun hər biri 10 milyon tenge ilə mükafatlandırılacaq.
