Tribuna.az xarici mətbuata istinadən xəbər verir ki, əsl adını gizli saxlamaq üçün Coral Hart təxəllüsündən istifadə edən yazıçı AFP-yə müsahibəsində on minlərlə nifrət mesajı aldığını və bir neçə ölümlə hədələnmə halı ilə üzləşdiyini bildirib.
Cənubi afrikalı yazıçı Coral Hart 2025-ci ilin fevralından bəri süni intellektdən istifadə etməklə 370-dən çox kitab nəşr etdirib. O, tənqidlərə və təhdidlərə baxmayaraq, bu üsulu qətiyyətlə müdafiə edir.
Sosial şəbəkələrdə onu “dələduz”, “canavar” adlandıranlar az deyil. Qırx yaşlarında olan yazıçı nəşriyyat sahəsində süni intellektin yayılmasının simvollarından birinə çevrilib.
Əsl adını qorumaq üçün Coral Hart təxəllüsündən istifadə edən müəllif AFP-yə müsahibəsində on minlərlə nifrət mesajı aldığını və bir neçə ölümlə hədələnmə halı ilə üzləşdiyini deyib.
Belə düşmən münasibətin hökm sürdüyü şəraitdə süni intellektdən istifadə edən müəlliflərin çox azı açıq danışmağa və üzünü göstərməyə razı olur.
“Mən irəli çıxıb deməyi seçdim ki, müzakirə etməli olduğumuz məsələlər var”, – Hart bildirib.
https://youtu.be/1v8f5nMwbsk?si=-F5LuE4iIjQATygO
“Bu texnologiya artıq buradadır… Bir qrup yazıçı etiraz edir deyə onu söndürməyəcəklər və ya elektrik şəbəkəsindən ayırmayacaqlar”.
Hart təxminən 20 ay əvvəl süni intellektlə yazmağa başlamazdan qabaq 14 il nəşriyyat sahəsində çalışıb və bu texnologiyadan istifadə etmədən bir neçə onlarla əsər yazıb.
O, müxtəlif süni intellekt modellərini öyrənməyə və kitab hazırlaya bilən sistem qurmağa üç ay vaxt sərf edib.
Hazırda yazıçı ChatGPT, Claude və Grok kimi alətlərdən istifadə edir. Onun sözlərinə görə, ChatGPT dialoqlar yaratmaqda “çox yaxşı”, bədii mətn yazmaqda isə “çox zəifdir”. Claude süjet quruluşunu yaxşı hazırlayır, lakin intim münasibətlərlə bağlı detallarda zəifdir. Grok isə onun ifadəsi ilə desək, “tamamilə ağlasığmaz” nəticələr verə bilir, amma açıq-saçıq səhnələrin yazılmasında faydalıdır.
Hart bildirib: “ChatGPT-yə və ya Claude-a sadəcə ‘mənə kitab yaz’ desəniz, qarşınıza zibil yığını çıxacaq. Çünki sistemin işləmək üçün heç bir materialı olmayacaq”.
Müəllif əvvəlcə əsərin ideyasını, üslubunu, personajların xüsusiyyətlərini və fəsillərin planını müəyyənləşdirir. Yalnız bundan sonra onun qurduğu sistem kitabı hazırlayır.
Hartın sözlərinə görə, fəaliyyətə başladığı ilk dövrlərdə bir abzası yazdırmaq üçün iki-üç sorğu verməli olurdu.
“İndi isə bütün kitabın ilkin variantını bir ardıcıllıqla hazırlaya bilirəm”, – deyə o bildirib.
Yazıçı qeyd edib ki, ötən ildən bəri süni intellekt modelləri xeyli təkmilləşib.
“Bədii mətnin keyfiyyəti yaxşılaşıb. Sintaksis və cümlə quruluşu da inkişaf edib”.
“Kitablar satılır”
Hartın sözlərinə görə, kitabın ilk variantı adətən keyfiyyətli olmur.
İlkin mətn əvvəlcə süni intellekt vasitəsilə məzmun və struktur baxımından redaktə edilir. Daha sonra süjetdəki uyğunsuzluqlar, zəif hissələr, yarımçıq personaj inkişafı, unudulmuş süjet xətləri və hətta personajların göz rənginin dəyişməsi kimi səhvlər aradan qaldırılır.
Prosesin sonunda insan korrektor mətni oxuyur, süni intellektin yaratdığı və əvvəlki mərhələlərdə nəzərdən qaçmış xüsusiyyətləri düzəldir, bəzi hissələri yenidən yazır. Bundan sonra kitabın nəşrə hazır olduğu bildirilir.
Hartın romanlarından biri “Amazon”un ən çox satılan 100 kitabı siyahısına daxil olub. Bununla belə, onun 371 kitabının böyük hissəsi romantik janrdadır və ciddi bazar araşdırmaları əsasında müəyyən oxucu qruplarının maraqlarına uyğun hazırlanır.
Yazıçının öz hesablamasına görə, onun kitabları rəqəmsal, çap və audio formatlarda ümumilikdə bir milyondan çox nüsxə satılıb. O, yalnız 2026-cı ildə bir milyon dollardan artıq gəlir əldə etdiyini bildirir.
Cənubi afrikalı müəllif hazırda öz metodunu bir neçə yüz nəfərə öyrədən fəaliyyət qurub və süni intellektdən istifadə edən yazıçılar üçün “Authorythm” adlı proqramı istifadəyə verməyə hazırlaşır.
Hart öz kitablarının hazırlanmasında süni intellektdən istifadə etdiyini yalnız satış platforması bunu tələb etdikdə açıqlayır.
“Son 16 il ərzində heç kim məndən yaradıcılıq prosesimin necə getdiyini soruşmayıb”, – deyə 10-dan çox başqa təxəllüslə də kitab nəşr etdirən yazıçı bildirib.
Onun sözlərinə görə, indi bu məsələni “düzgün səbəblərə görə” açıq müzakirə etməyə hazırdır.
Süni intellektlə yaradılan aşağı keyfiyyətli mətn, video, musiqi və təsvirləri ifadə edən “AI slop” anlayışına töhfə verməkdə ittiham olunan Hart əsas meyarın satış olduğunu düşünür.
“Kitablar satılır. Oxucular keyfiyyətsiz kitabları oxumurlar, onları geri qaytarırlar”, – deyə o bildirib.
Yazıçı həmçinin Haiti əsilli kanadalı Thelyson Orelienin romanı ətrafında yaranan mübahisəni izlədiyini deyib. Süni intellektdən istifadə ittihamlarından sonra həmin əsər Fransanın nüfuzlu Qonkur mükafatı üzrə qısa siyahıdan çıxarılıb. Nəşriyyat isə çərşənbə günü bu istifadənin olduğunu təsdiqləyib.
Hartın fikrincə, qalmaqaldan əvvəl kitab tənqidçilər tərəfindən müsbət qarşılanıb və yaxşı satılıb.
O, belə bir sual verib: “Əgər bir əsərə nifrət etmək üçün onun süni intellektlə hazırlandığını bilməyiniz lazımdırsa, siz əslində əsərə nifrət edirsiniz, yoxsa süni intellektə?”
İmran Kərimli
