Dünyanın bir sıra ölkələrində avtomobillərin texniki vəziyyətinə nəzarət müxtəlif mexanizmlərlə həyata keçirilir. Azərbaycanda isə avtomobillərin texniki baxışdan keçirilməsi sistemi hələ də qüvvədədir.
Bəs texniki baxışın tamamilə ləğv edilərək yalnız utilizasiya rüsumunun saxlanılması mümkündürmü?
Mövzu ilə bağlı KONKRET.az-a açıqlama verən nəqliyyat eksperti Eldəniz Cəfərov bildirib ki, hazırkı mərhələdə Azərbaycanda texniki baxış sisteminin ləğvinə ehtiyac yoxdur.
Ekspertin sözlərinə görə, utilizasiya mexanizminin tətbiqi texniki baxışın aradan qaldırılması üçün əsas sayıla bilməz:
“Bizdə hələ texniki baxışa ehtiyac var. Utilizasiya proqramının mövcudluğu o demək deyil ki, texniki baxış ləğv edilməlidir. Texniki baxış xüsusilə köhnə avtomobillərin texniki vəziyyətinə nəzarət baxımından əhəmiyyətlidir.
Yeni avtomobil alındıqda müəyyən müddət ərzində onun texniki baxışdan keçirilməsinə ehtiyac olmur. Lakin avtomobil bir neçə il istismar edildikdən sonra texniki baxış məsələsi aktuallaşır. Bu baxımdan köhnə avtomobillərin texniki vəziyyətinə nəzarət vacibdir”, – deyə ekspert vurğulayıb.
Beləliklə, ekspertin fikrincə, utilizasiya mexanizminin tətbiqi texniki baxışın ləğvi üçün əsas deyil. Xüsusilə uzun müddət istismar olunan avtomobillərin texniki vəziyyətinə və yol hərəkəti təhlükəsizliyinə nəzarət baxımından Azərbaycanda texniki baxış sisteminin saxlanılmasına ehtiyac var.
